Hetta skrivar Fólkaheilsuráðið í sambandi við, at tað nú aftur verður skipað fyri ABC viku.
– Tíbetur síggja vit, at vit duga væl at finna loysnir, sum bera til. Hóast vit ikki kunnu hava nakað tiltak; og tiltakið, sum plagar at vera Altjóða sálarheilsudagin 10. oktober er eisini avlýst, fara vit fyri triðju ferð at skipa fyri ABC vikuni.
Fólkaheilsuráðið fer á sosialu miðlunum at seta spurningar sum t.d.:
Hvat ger teg glaða/n?
Nær gjørdi tú seinast okkurt nýtt?
Hvat gevur tær orku?
– Tá ið vit seta okkum sjálvum ella øðrum tílíkar spurningar, kann tað seta nakrar tankar í gongd og vit taka okkum møguliga tíð til at seta orð á ella hugleiða um viðurskifti, sum vit annars ikki geva okkum far um. Soleiðis kunnu vit menna okkara sálarligu heilsu, sigur Fólkaheilsuráðið.
Fólkaheilsuráðið fer eisini at seta spurningar, sum kunnu vera hugskot til at gera okkurt, sum kann skapa gleði bæði fyri okkum og onnur, spurningarnir kunnu vera ein áminning um at gera okkurt gott, t.d.:
Hevur tú minst til at ringja til ommu tína?
Hevur tú fingið fríska luft í dag?
Hevur tú tikið rusk upp av vegnum í seinastuni?
Hetta, bæði fyri at skapa tilvit um, hvat hevur týdning fyri, at vit eru glað og gera okkum tilvitað um at gera meira av tí, sum okkum dámar og gera nakað gott fyri at stimbra sálarligu heilsuna hjá okkum sjálvum og øðrum.
Fólkaheilsuráðið skipar fyri ABC vikuni, men tað eru ymiskir samstarvsfelagar í ABC fyri sálarliga heilsu, sum eisini varpa ljós á evnið, sí skrá á heimasíðuni hjá Fólkaheilsuráðnum http://www.folkaheilsa.fo/salarlig-heilsa/abc-vika
