Síðani summarsteðgin hevur AB av álvara fingið um endan. Nýggju donsku spælararnir hava roynst væl, og AB hevur lyft seg alt nærri heiðursmerkjaplássum og harvið uppflyting.
Í dag vóru teir næstbestu hjá Víkingi á Argjum, og tað endaði málleyst.
AB hevði í seinna hálvleiki nógvar góðar málmøguleikar, men tað eydnaðist ikki at fáa bóltin í málið aftanfyri Sonna Højgaard.
Mads Zaar og Ardit Murati høvdu góðar møguleikar í seinna hálvleiki, og tað hevði Rógvi Skála hjá heimaliðnum eisini, uttan at tað eydnaðist at fáa mál.
Víkingur hevði góðar møguleikar í fyrra hálvleiki, men tað eydnaðist ikki Fannhard Skoradal, Jónatan Lervig og Jákup Andrias Thomsen at fáa bóltin framvið Anders Ploughmann Nagel, sum í dag vardi AB málið, nú Milos Budakovic aftur er skaddur.
Úrslitið í dag ber við sær, at AB hevur 32 stig, og at Víkingur hevur 33 stig og er næstfremst.
Um eina viku fer Víkingur aftur suður í høvuðsstaðin. Tá verður HB mótstøðuliðið. Um eina viku fer AB at spæla á Skála.
