Í gjár boðaðu fyrst Runavíkar kommuna og Klaksvíkar kommuna frá, at tá semja er gjørd millum Pedagogfelagið og Fíggjarmálaráðið, verður ansingargjaldið endurgoldið fyri tíðina, sum stovnarnir eru stongdir.
Boðskapurin frá kommununum báðum var, at foreldrini skulu ikki rinda fyri eina tænastu, sum tey ikki fáa.
Í gjárkvøldið boðaði Tórshavnar kommuna frá, at eisini foreldur í Havn fáa sítt barnaansingargjald endurrindað, tá semja er komin í lag og í morgun boða Vágs kommuna, Sands kommuna og Nes kommuna frá tí sama. Í Tórshavnar kommunu verður hetta tó gjørt við at gjaldið fyri komandi mánað verður lækkað samsvarandi, heldur enn at nakað verður endurrindað.
Týsdagin sendi Føroya Pedagogfelagið allar leiðarar og varaleiðarar í dagstovnunum í verkfall, og í morgun kom verkbannið hjá Kommunala Arbeiðsgevarafelagnum í verk, so at allir dagstovnar nú eru stongdir.
Leygardagin fara allir námsfrøðingarnir, sum starvast í Almannaverkinum eisini í verkfall.
