SKAT leitar nú eftir eigarunum av 8.500 stongdum bankakontum. Tilsamans standa um 90 milliónir krónur á kontunum.
Tað er serliga í bankunum Nordea, Jyske Bank og Nykredit, at nógvar kontur standa uttan eigara í løtuni. Konturnar hava nú verið stongdar í tvey ár uttan at eigararnir hava latið við seg koma. Gera eigararnir ikki vart við seg komandi 12 mánaðirnar, fella pengarnir í statskassan, sigur TV2.
Sambært donskum miðlum standa 5,6 milliónir krónur á einari av kontunum, meðan tað standa yvir 100.000 krónur á 114 kontum. Tað kann tí vera heilt fitt av peningi at heinta.
TV2 hevur gjørt eina einfalda leitiskipan, so skjótt er at kanna, um títt navn stendur á listanum. Fleiri føroysk nøvn eru á listanum og í fleiri førum er eisini viðmerkt, at eigarin býr ella hevur búð í Føroyum.
Kanska fært tú eina óvæntaða jólagávu í ár? Leitiskipanina er at finna niðast í greinini, tú endar á, tá tú trýstir her.
