Líkt er til, at nógv sild á Skálafjørðinum í løtuni.
Á heimasíðuni hjá Fiskiveiðieftirlitinum er fitt søga um hin 81 ára gamla, Jógvan Ingvard Olsen á Toftum, fyrrverandi løgtings-og landsstýrismann, sum saman við abbasoninum í skýmingini í gjárkvøldið setti tvey sildagørn út fyri Tofta bygd.
Í lýsingini í morgun fóru teir at draga gørnini, og nógv var í. Jógvan Ingvard Olsen metti, at veiðan var um 1000 pund av góðari sild.
- Tikið verður burturúr í bátahylinum á Toftum, og høvdu abbin og abbasonurin góða hjálp frá Anfinni Olsen.
Jógvan Ingvard Olsen leggur aftrat, at onkuntíð hevur nógv sild verið á Skálafjørðinum.
- Tá Nykur læt upp í 1969, var ein triðingur av tí, sum tikið bleiv ímóti, sild av Skálafjørðinum - ella umleið 500 tons, sigur hin 81 ára gamli við heimasíðuna hjá Fiskiveiðieftirlitinum.
Myndin av bátinum hjá Jógvan Ingvardi Olsen er av heimasíðuni hjá Fiskiveiðieftirlitinum.
