Borgarakríggið í Angola endaði við vápnahvíld í 2002. Síðani hevur samfelagið roynt at fóta sær, men hóast kríggið er av, verða fólk framvegis særd av teimum túsundtals landminunum, sum liggja eftir frá krígsárunum, og sum verða mettar sum tann størsta hóttanin ímóti øllum samfelagnum.
Á einari ráðstevnu í høvuðsstaðnum Luanda fyrradagin kom fram, at higartil eru umleið 80.000 fólk vorðin offur fyri landminunum. Balbina Silva, sum stendur á odda fyri einari verkætlan, sum hevur til endamáls at beina fyri landminunum í Angola, segði á ráðstevnuni, at landminurnar fara at krevja fleiri offur afturat.
- Landminurnar eru eitt tekin um fátækradømi, tí tær forða fyri menning í samfelagnum, og tær raka tilvildarlig fólk, segði Balbina Silva sambært tíðindastovuni AP. Hon hevur júst skrivað eina frágreiðing um, hvussu samfelagið kann taka sær av teimum, sum eru vorðin offur fyri landminunum.
Reyði Krossur hevur mett, at umleið ein millión landminur liggja enn í jørðini í Angola, og at talan er um 70 ymisk sløg av minum, sum eru gjørdar í 21 ymsum londum. Nógvar av landminunum eru gamlar, men framvegis líka vandamiklar.
