Danska løgreglan stendur at kalla á berum, eftir at ikki færri enn 75 skotin vórðyu latin av ímóti einum íbúðarhúsum í Taastrup við Keypmannahavn í gjárkvøldið. Eingin varð raktur, men ein kvinna mátti á sjúkrahúsið við sárum, sum hon fekk av glaspettum.
Løgreglan í Keypmannahavn heldur, at skottilburðurin í gjárkvøldið hevur samband við eina uppgerð ímillum brotsmannalið, men løgreglan veit ikki, hvørjir gerningsmenninir eru, ella hvat stríðið snýr seg um.
Kanningar hjá løgregluni vístu, at skotini høvdu rakt úthurðar og vindeygu í fimm íbúðum umframt fleiri bilar. Millum annað varð skotið eftir íbúðum uppi á triðju hædd, og tað ger eingin av tilvild, sigur Carsten Jansson hjá løgregluni í Keypmannahavn við Ritzau.
