Ódnarveðrið um vikuskiftið hevur elvt til nógvar skaðar á okkara landsvegajervið.
Tað staðfestir Landsverk í dag.
Tilsamans eru heili 70 skaðar staðfestir, men Landsverk leggur afturat, at teir flestu skaðarnir eru smáir.
Í flestu førum gekk ódnin út yvir skeltir, men eisini nøkur busskýlir brotnaðu, eins og bilaverjur koppaðu.
Serliga var tað í norður- og eystara parti av landinum, at vindurin var harðast, og hetta sæst eisini aftur á yvirlitinum yvir skaðar, sum eru staðfestir á landsvegakervinum.
Í Norðurøkinum hjá Landsverki, ið fevnir um Norðoyggjar og Eysturoy, eru eini 50 av teimum umleið 70 skaðunum, staðfestir.
Nógv teir flestu skaðarnir eru á skelti, men í nøkrum førum er talan um brotnaði busskýlir, eins og onkrar bilverjur og garðar máttu lúta undir nógva vindinum.
Hinir skaðarnir eru í høvuðsheitum hendir á landsvegakervinum í Streymoy í Vágum, men vegakervið í Sandoy og Suðuroyr so at siga er sloppið snikkaleyst.
- Fólk frá stovninum arbeiða við at fáa brekini í rættlag, men tað fer at ganga nakað av tíð, áðrenn allir skaðarnir eru rættaðir, sigur Árni Jacobsen, økisleiðari í Norðurøkinum hjá Landsverki við heimasíðuna hjá Landsverki.
|
