Hósdagin verður stórt stórt ítróttartiltak í Gundadali fyri børn.
Skipað verður fyri ítróttardegi fyri øll frítíðarskúla-børn í Tórshavnar Kommunu.
Talan er um heili 600 børn, ið fara at luttaka í ymiskum spølum og kappingum, eitt at koyra mánabil , spæla hockey, vatn stafett og mangt annað stuttligt fyri barnsligar sálir.
Tiltakið byrjar klokkan 13, tá ið Joan Petur Hentze, trivnaðarstjóri í Tórshavnar Kommunu, setur ítróttardagin.
Síðan verða børnini býtt sundur í bólkar so at farast kann í gongd.
Hvør stovnur hevur sín lit, sum børnini á ein ella annan hátt hava uppi á sær, tað veri seg á blusuni, á keppinum ella á pannubandinum, eins og hvør stovnur hevur eitt flagg við sínum liti.
At enda fáa øll børnini heiðursbræv fyri luttøku.
Tiltakið, sum hevur til endamáls at geva øllum frítíðarskúlabørnum í kommununi eitt felagsupplivilsi at sjóða tey saman.
Væntandi endar tiltakið klokkan 16.
