Tær tríggjar kommunurnar við Skálafjørðin fingu tilsaman 5,65 milliónir meiri inn í skatti fyrra hálvár í ár, enn tær fingu sama tíðarskeið í fjør.
Í krónum var vøksturin størstur í Runavíkar kommunu. Har var meirinntøkan 3.987.592 krónur, sum svarar til 6,98 prosent. Samlaða skattainntøkan hjá Runavíkar kommunu fyrra hálvár í ár var 61.081.105 krónur.
Lutfalsliga var vøksturin størstur í Sjóvar kommunu, har meirinntøkan var 7,05 prosent ella 942.372 krónur. Samlaða skattainntøkan í Sjóvar kommunu fyrra hálvár í ár var 14.317.954 krónur.
Í Nes kommunu var meirinntøkan 711.062 krónur ella 4,26 prosent. Samlaða skattainntøkan í Nes kommunu fyrra hálvár í ár var 17.415.703 krónur.
