50 súkklarar við í ár

Kappingin eitur tað sama, sum hon hevur itið í mong harrans ár, men kortini er talan um nýggjan høvuðsstuðul, ið leggur navn til. Áðrenn hevur kappingin havt navn eftir føroyska oljufelagnum, Statoil, sum í fjør skifti navn til Effo, men nú er høvuðsstuðulin Statoil Faroes, ið fæst við oljuleiting í før­oysk­um øki og er partur av altjóða olju­felag­num, Statoil.
– Kappingin líkist sær sjálvari og er aftur í ár skipað sum liðkapping, samstundis sum hon eisini er ein­stak­lingakapping. Hetta var roynt við sera góðum úrsliti í fjør, men at so stórur útlendskur áhugi er fyri kappingini hesa ferð, ger tað ikki minni spennandi at skipa fyri, sigur formaðurin í Tórshavnar Súkklu­felag, Geyr Gilsteinsson, ið eisini er høvuðsdómari.
– Vit hava annars verið noyddir at broytt øll skelti og alt tað graf­iska, ið hoyrir til kappingina, tí Statoil Faroes brúkar bæði annan lit og ann­að snið. Ein onnur broyting verð­ur eisini, at nú eru málini ikki longur á bensinstøðum, sum tey plagdu at vera tað.
Hetta við útlendska áhuganum er so sanniliga ein stór broyting, tí nú tað av álvara nærkast, eru ikki færri enn 50 nøvn á yvirlitinum yvir tilmeldaðar súkklarar, og serliga úr Danmark koma nógvir súkklarar við til kappingina. Íslendingar og føroyingar eru sjálvandi við, sum vanligt, umframt at fleiri súkklarar hesa ferð eru úr Belgia.

Hava lokkað aðrar
– At ikki færri enn 21 danskir súkkl­arar eru við hesa ferð, er einum av okkara góðu, gomlu kenningum fyri at takka. Jens Glerup, ið hevur verið virkin í føroyskari súkkling og eisini fleiri ferðir hevur verið høvuðsdómari, hevur lokkað allar hinar við sær til Føroya. Hann verð­ur forrestin sjálvur við, men so ofta hevur hann staðið sum dómari og fyri­reikari, at hetta er bara aðru ferð, at hann sjálvur koyrir kapp­ing­ina, sigur Geyr.
Íslendingar eru fastir fúsir, tá Statoil Kring Føroyar er á skránni, og í ár verður heldur einki undan­tak. Tilsamans eru teir átta í tali, og teirra millum er eitt nú Hafsteinn Ægir Geirsson, ið vann kappingina í fýra ár á rað, frá 2005 til 2008.
– So eru sjálvandi eisini allir før­oyingarnir við, ið plaga at vera við, og teirra millum eru teir tríggir, sum í fjør vóru á vinnandi liðnum: Torkil Veyhe, Gudmundur Joensen og Gunnar Dahl-Olsen, sigur Geyr Gilsteinsson.
– Men eitt sindur sjáldsamt er tað kanska, at ikki færri enn trígg­ir súkklarar úr Belgia eru við hesa ferð. Orsøkin er tann, at Wim De Dobbeleer, sum í fjør var við íslend­ingunum í Hjólreiðafélagi Reykja­víkur, síðani er fluttur heimaftur til Belgia. Men hann hevði sjálvur hug at koma aftur, og honum eydnaðist so at lokka tveir aðrar við.
Talið á kvinnum er eisini met­høgt hesa ferð, tí ikki færri enn seks kvinnur verða við í kappingini, umframt at seks unglingar eisini fara at kappast. Og so verða eisini tveir blaðungir danskir dreingir, 11 og 12 ára gamlir, við í kappingini.

Liðini draga út
Hetta er fimtandu ferðina á rað, at Tórshavnar Súkklufelag skip­ar fyri Statoil Kring Føroyar, og nú kappingin hevur methøgt lut­takaratal, tulka fyrireikararnir tað, sum at teir eru á rættari leið.
– Nú er talan um eina opna kapp­ing, so øll kunnu vera við, sum hava hug til tað. Men at kappingin sær út til at fáa alsamt størri áhuga uttan fyri landoddarnar, ger tað sjálvandi nógv stuttligari at skipa fyri og leggja til rættis, samstundis sum tað er ein ovurhonds stór avbjóðing, tí so fjølment eru vit heldur ikki, sigur Geyr Gilsteinsson.
Nógv er sjálvandi at halda skil á, tá talan er um eina so stóra kapp­ing, men ein táttur er kortini, sum enn ikki liggur í hondunum hjá fyri­skiparunum. Tað er telvingin um, hvørjir súkklarar velja at taka seg saman í lið til liðkappingina.
– Sum er, vita vit bara um tvey lið, sum er eitt við veteranum og eitt við unglingum. Hinir hava enn ikki boðað frá, hvussu teir fara at skipa seg, men eg havi varhugan av, at tingast verður dúgliga, tí allir vilja gera sítt fyri at gerast partur av ein­um liði, ið hevur ein møguleika, sigur Geyr.
– Kenni eg súkklararnar rætt, so leggja teir heldur ikki kortini á borðið fyrr enn í síðstu løtu, men nú mugu teir skjótt melda út, tí tað er neyðugt hjá okkum at vita tað í góðari tíð, áðrenn lagt verður til brots í Klaksvík mikukvøldið.