- Allar verkætlanir, sum eru í gongd, skulu gerast lidnar.
Tað siga tey í Klaksvíkar kommunu í dag. Tey ásanna eisini, at neyðugt tí er við lántøku á 50 miljónir krónur, soleiðis at arbeiðast kann víðari við fleiri av teimum spennandi verkætlanum, sum koma at mynda býin í mong ár framyvir.
Á skránni til býráðsfundin í Klaksvík í kvøld er uppskot um lántøku á 50 miljónir til viðgerðar.
- Orsøkin til lántøkuna er, at dagførda fíggjarætlanin fyri 2022 vísir eitt hall á 18,8 miljónir, 20 miljónir til gjald av lániavdráttum, og peningur skal eisini útvegast til at gera verkætlanir lidnar.
Í Klaksvíkar kommunu vísa tey á, at tá sitandi býráð tók við hin 1. januar í 2021, var býráðið samt um, at kommunan skal stremba eftir at halda allar teir sáttmálar og bindingar, sum bæði fyrrverandi og núverandi býráð hava undirskrivað.
- Tí er neyðugt við hesi lántøku, soleiðis at haldast kann fram við liðugtgerð av teimum verkætlanum, sum eru í gongd, sigur Karl H. Johansen, borgarstjóri í Klaksvíkar kommunu.
Á heimasíðuni hjá kommununi í dag verður víst á nakrar av størru verkætlanum, sum antin eru lidnar ella komnar væl áleiðis, og hesar síggjast við at hyggja inn á www.klaksvik.fo
- Arbeiðið við fíggjarkarminum fyri 2023 er farið í gongd. Somuleiðis verður í næstum farið undir at dagføra langtíðar íløguætlanina hjá kommununi.
Lagt verður aftrat, at skuldin hjá Klaksvíkar kommunu í løtuni er 311 miljónir, og við lántøkuni verður skuldin tilsamans 361 miljónir. Kommunan rindar 20 miljónir í avdráttum í 2022, og verður skuldin við ársenda 341 miljónir krónur.