Í novembur í fjør fekk ein lækni í týska býnum Schwerin boð um at koma at hyggja at eini smágentu. Hann gjørdi alt fyri eitt av at koyra gentuna á sjúkrahús, men hóast læknarnir har royndu, var einki at gera. Gentan doyði.
Tann 5 ára gamla Lea-Sophie skuldi av røttum viga umleið 40 pund, men tá hon kom á sjúkrahúsið, vigaði hon bara 15 pund. Lea-Sophie doyði heilt einfalt í hungri og tosta.
Kanningar hjá løgregluni avdúkaðu, at foreldrini høvdu misrøkt gentuna í fleiri mánaðir, og nú eru tey ákærd fyri tilætlað morð og kunnu fáa lívlanga fongsulsrevsing. Tey hava greitt løgregluni frá, at tey hildu ikki, at gentan var so sjúk, sum hon var. Tey eiga eisini ein tveir mánaðir gamlan son, og honum hava myndugleikarnir tikið sær av.
Málið um Lea-Sophie hevur skakað Týskland, og kanslarin, Angela Merkel, sigur, at hon er skelkað av, at tílíkt yvirhøvur kann henda í einum vælferðarsamfelagi sum tí týska.
