Í nátt hevur løgreglan havt eitt málrættað átak at kanna, um bilførarar koyra ávirkaðir av rúsdrekka ella rúsevnum, og hugt hevur eisini verið eftir, um dekkini eru í lagi.
Løgreglan var norðanfyri, har tey steðgaðu umleið 20 bilum, og tey vóru í miðstaðarøkinum, har tey steðgaðu umleið sama tali av bilum.
- Men, her var einki at finnast at, og eingi mál vórðu skrivað í kanningunum í nátt, visti vaktleiðarin at siga í morgun.
Í Saltangará misti ein bilur nummarspjøldrini í nátt, tí eigarin ikki hevði síni viðurskifti í lagi. Í slíkum føri er talan oftast um ógoldið vektgjald, trygging ella vantandi sýn.
Vaktleiðarin leggur aftrat, at tað annars hevur verið stak friðarligt hjá løgregluni í nátt.
