- Tað eru nógv ár síðani so nógv ross hava melda til kappríðing á ólavsøku. 37 ross luttaka í sjey ymiskum bólkum. Man skal heilt aftur til aldarskiftið at finna so høgt tal av rossum til kappríðing á ólavsøku. Aftaná nøkur heldur sløk ár, vónar nevndin í Føroya Ríðingarfelag at hetta er tekin um betri tíðir fyri kappríðingina.
Tað skrivar Føroya Ríðingarfelag í tíðindaskrivi sent fjølmiðlunum í morgun. Brandur í Dali, formaður í felagnum, greiðir frá, at tað er ein broyting, ið er orsøkin til góðu undirtøkuna.
- Tað er serliga flokkarnir Tølt og Skeið sum hava høgt luttøkutal, Brandur í Dali, formaður í Føroya Ríðingarfelag sigur í viðmerking at hetta er tekin um at tað var røtt avgerð at taka hesar flokkar við aftur í kappingina. Teir flokkar sum nú eru meira soltnir, eru Trav og Tvíspor ung. Brandur í Dali sigur at arbeitt verður við broytingum í hesum flokkum, soleiðis at teir eisini gerast meira áhugaverdir hjá reiðfólkum, skrivar felagið.
Ólavsøkukappríðingin er sera siðbundin kapping. Fyrsta kappríðingin á ólavsøku var í 1921, árini 1921 til 1927 var hon á Sundsvegnum - Síðani flutti kappingin út á Velbastaðvegin har kappast var til og við 1970. Síðani 1971 hevur verið kappast á breytini hjá Føroya Ríðingarfelag í Marknagili.
