Ein dómstólur í Kalifornia broytti í gjár deyðadómin hjá Douglas Stankewitz, sum í 34 ár hevur bíðað eftir at verða tikin av døgum. Í rættinum gjørdu tveir av teimum trimum dómarunum av at broyta dómin til lívlangt fongsul.
Douglas Stankewitz, sum nú er 54 ára gamal, varð í 1978 dømdur til deyða fyri at hava myrt eina kvinnu, og tey 34 árini síðani hevur hann verið á deyðagongini í fongslinum.
Í næstu viku verður fólkaatkvøða í Kalifornia um at seta deyðarevsing úr gildi, men sambært meiningakanningunum er ein lítil meiriluti fyri at varðveita hana. Umleið 700 deyðadømdir fangar eru í fongslum í Kalifornia, men eingin fangi er avrættaður síðani 2005.
