Tað runnu í fjør 31.258.123 fleiri krónur í skatti í kommunukassan hjá Tórshavnar kommunu, enn tað gjørdu í 2016.
Fyribils uppgerðin hjá Taks vísir, at kommunuskatturin í høvuðsstaðnum í fjør var 730.220.087 krónur, meðan hann í fyrra árið var 698.961.964 krónur.
Samlaði kommunuskatturin í Føroyum var í fjør 1.792.867.987 krónur. Harvið átti Tórshavnar kommuna 40,73 prosent av øllum kommunuskattinum í fjør.
Merkisvert er tað, at lutfalsligi vøksturin í kommunuskattinum var lægri í høvuðsstaðnum, enn hann var í miðal fyri allar kommunurnar. Miðal vøksturin fyri alt landið var 6,01 prosent, meðan hann í Havn var 4,47 prosent.
Í hinum kommununum í Streymoy var vøksturin lutfalsliga størri, enn hann var í Havn. Í Kvívikar kommunu var hann tó ikki so nógv størri. Har var vøksturin 4,96 prosent, sum svarar til 1.040.161 krónur.
Í Vestmanna kommunu var vøksturin 7,38 prosent, sum svarar til 3.005.902 krónur.
Í Sunda kommunu, sum hevur heimstað á Oyrarbakka, men sum er væl umboðað vestarumegin Sundalagið, var vøksturin 7,3 prosent ella 4.296.196 krónur.
Í teimum báðum kommununum í Vágum var vøksturin eitt vet yvir miðal fyri alt landið.
Í Vága kommunu, sum fevnir um Sandavág, Miðvág og Vatnsoyrar, var vøksturin 6,86 prosent, sum svarar til 4.786.045 krónur.
Í Sørvágs kommunu, sum fevnir um Sørvág, Bø, Gásadal og Mykines, var vøksturin 7,0 prosent, sum svarar til 2.819.793 krónur.
