Fiskivinna
Samstundis, sum nøgdirnar av toski, ið landaðar eru seinnu árini, eru nógv minkaðar, eru nøgdirnar av upsa nógv øktar.
Hetta sæst ikki minst aftur í tølum hjá landingarmiðstøðini hjá Beta í Saltgangará, sum serliga landar partrolarar, ið veiða upsa.
Gulllaksalandingar eru eisini ein týðandi partur av virkseminum hjá Beta í vertíðini.
Fleiri landingar
Fýra teir fyrstu mánaðirnar í ár eru tilsamans 13.800 tons løgd upp í Saltangará, sum er heili 3.000 tons fleiri enn somu tíð í fjør.
Taka vit árið 2007, landaði Beta hetta árið 7.500 tons fram til endan av apríl, og tað eru heili 6.300 færri enn fram til endan av sama mánaði í ár.
Tað er tó ikki bara upsin, sum ger allan munin í ár, tí gulllaksaveiðan byrjaði eisini væl fyrr í ár enn eitt nú í fjør.
Við endan av apríl mánaða í ár hevði landingarmiðstøðin hjá Beta landað tilsamans 1.910 tons av gulllaksi, meðan nøgdin av gulllaksi somu tíð í fjør var 500 tons – og í 2007 380 tons.
Góð upsaveiða
Á landingarmiðstøðini vísa tey á, at umframt øktu gulllaksanøgdirnar higartil í ár, hevur upsaveiðan í ár eisini verið rættiliga góð.
Gomlu kubatrolararnir eru skiftir út við nýggjari og betri skip, har nýbygningarnir, Stelkur og Bakur, vóru teir fyrstu.
- Rókur og Lerkur eru eisini komnir í flotan eins og nýbygningarnir, Heykur og Falkur, hava verið í gongd allar teir fyrstu fýra mánaðirnar í ár, siga tey.
Heykur og Falkur høvdu ávísar trupulleikar at dragast við, tá teir komu í flotan við endan av 2007. Skipini, sum komu til landið í desember hetta ár, rendu seg beint í fiskimannaverkfallið, sum var um ársskiftið 2007/ 2008.
Tá skipini so umsíðir sluppu útaftur seint í januar 2008, fingu tey ávísar byrjunartrupulleikar at dragast við. Tí fingu tey heldur ikki fulla úrtøku hetta várið.
Í vár hava øll seks skipini hjá Beta havt góða og støðuga veiði, og hetta saman við øktu gulllaksalandingunum er orsøkin til, at landaðu nøgdirnar fyrstu fýra mánaðirnar í ár hava verið nógv størri enn nakrantíð.
