25 ára gamli norski laksamiljarderurin, Gustav Magnar Witzøe, er ófatiliga ríkur. Hann hevði tó neyvan roknað við, at árið í ár fór at roynast so væl fíggjarliga.
Higartil í ár hevur hann nevniliga sæð síni partabrøv í alifelagnum Salmar næstan tvífaldast – við einum fíggjarligum vinningi á 11,4 miljardir krónur.
Hetta svarar til, skrivar finans.dk, at Gustav Magnar Witzøe hevur tjent 37 miljónir krónur hvønn dag higartil í 2018. Partabrøvini hjá norska miljarderinum í Salmar hava eitt samlað virði á 22 miljardir krónur.
Gustav Magnar Witzøe hevur arvað meginpartin av íløgufelagnum Kverva, sum familjan átti, og tað var pápi hansara, Gustav Witzøe, sum legði lunnar undir felagið í nitiárunum.
Felagið eigur umleið helmingin av partabrøvunum í Salmar, sum soleiðis hevur givið norska laksamiljarderinum 11,4 miljardir krónur higartil í ár.
Gustav Magnar Witzøe er føddur í Frøya í Trønderlag í Noregi í 1993.
