Meðan Klaksvíkar kommuna fyrr í vikuni kundi gleðast um, at innkomnu tilboðini upp á nýggja skúlan í Klaksvík vóru bíligari enn mett, so mugu tey í Tórshavnar kommunu ásanna, at teirra prísmeting av skúlanum á Fløtum var munandi lægri enn tað, ið fyritøkurnar meta.
29. juni 2016 var nevniliga licitatión uppá høvuðsarbeiðstøkuna til skúlan á Fløtum, har bíligasta boðið var 25.136.000 krónur yvir prísmetingina hjá Tórshavnar kommunu.
Kommunan metti frammanundan, at høvuðsarbeiðstøkan fór at kosta 247.864.000 krónur, men tað vóru tær fyritøkur, ið bjóðaðu upp á arbeiðið, ikki samdar í.
P/F MT Højgaard Føroyar átti lægsta boðið, ið var 273.000.000 krónur, Sp/f TG-Verk hevði eitt boð upp á 275.982.636 krónur, meðan P/F Articon og Sp/f Búsetur átti dýrasta boðið á 293.866.875,62 krónur.
Kommunan upplýsir, at nú verður farið undir at granska innkomnu boðini við atliti kostnaði, fyrivarni og alternativum tilboðum. Síðan verður politiskt støða tikin til, hvør fær í boði at samráðast um eina partalagsavtalu og har raka ein targetprís. Um hetta ikki ber á mál, verður støða tikin til um farast skal víðari við sama arbeiðstakara.
