Sambært fyribils uppgerð byrja 231 børn í fyrsta flokki í seks teimum størstu skúlunum í Tórshavnar kommunu komandi skúlaár. Freistin at innskriva børn til fyrsta flokk var úti í síðstu viku.
Flest næmingar eru í ár innskrivaðir til fyrsta flokk í Skúlanum við Løgmannabreyt. Har byrja 46 næmingar í fyrsta flokki eftir summarfrítíðina.
Yvirlitið yvir teir 231 næmingarnar, sum byrja í fyrsta flokki í skúlunum í Havn í ár, sær soleiðis út:
Skúlin við Løgmannabreyt 46
Skúlin á Fløtum 45
Skúlin á Argjahamri 45
Sankta Frans skúli 41
Hoyvíkar skúli 32
Eysturskúlin 22
Tilsamans 231
Øll børnini, sum fara í fyrsta flokk, sleppa at ganga í tí skúlanum, sum tey hava sett sum fyrsta val í sambandi við innskrivingina.
67 børn eru eisini innskrivað til forskúlarnar á Argjahamri og í Sankta Frans skúla. 52 teirra eru innskrivað í forskúlan í Sankta Frans skúla, har pláss er fyri 48 forskúlabørnum.
