Bara tveir tímar áðrenn ein stórur trailari koyrdi inn í mannamúgvuna við jólamarknaðin í Berlin mánadagin hevði eitt ferðalag við 23 føroyingum vitjað júst har, sum yvirgangsatsóknin varð framd.
– Hetta var ræðuligt at uppliva, so absurd og óforstáiligt. Vit eru eru skelkað og sjálvandi fegin um at vera á lívi.
Tað sigur Virgar Dalsgaard við Sosialin í dag. Hann var sjálvur ferðaleiðari fyri einum ferðalag við 22 føroyingum, sum hava vitjað í Berlin síðani sunnudagin.
– Men vit eru samstundis fegin um at kunna sosialisera okkum við berlinarum í hesum døgum og síggja, hvussu stálsettir teir eru, og hvussu væl teir duga ikki at lata seg kúga av yvirgangi, sigur hann.
Føroyska ferðalagið gekk og spákaði millum sølubúðirnar í hesum jólamarknaði mitt í Berlin bara góðar tveir tímar áðrenn ein lastbilur trumlaði í gjøgnum mannamúgvuna, drap 12 fólk og særdi 50.
– Vit vórðu skelkað, og tað eru vit enn. Men tað var kortini ongantíð so ringt, at nakar okkara ætlaði at rýma. Men tað er so óveruligt at hugsa sær, at vit hava gingið har beint frammanundan, sigur Virgar Dalsgaard millum annað í samrøðuni við Sosialin.
