Í einari kanning í Klaksvík gjáramorgunin var skriviblokkurin hjá løgregluni frammi ikki færri enn 20 ferðir.
- Hetta var í einari kanning í Biskupsgøtu. Tey størstu brotini, sum góvu klipp í koyrikortið, snúðu seg um børn, sum sótu leys í bilinum.
Vaktleiðarin á løgreglustøðini visti í morgun at siga, at seks slík mál vórðu skrivað, og haraftrat vóru fleiri bøtur givnar fyri onnur brot.
- Onkur hevði ikki koyrikorti uppi á sær, onkur vaksin koyrdi ikki í seðlum, onkur tosaði í handhildnari fartelefon, ein bilur hevði slitin dekk, og í onkrum føri vóru feilir við lyktum, blunkljósum ella øðrum.
Løgreglan sigur, at í 20 førum góvu tey ávikavist klipp og bøtur, og í sjey førum var talan um átalur fyri brot á ferðslulógina.
- Vit hava eisini verið úti og kannað ferðsluna í nátt og aftur í morgun, og her hevur serliga verið hugt eftir, um tað eru bilførarar, sum koyra ávirkaðir av rúsdrekka ella øðrum.
Vaktleiðarin visti í morgun at siga, at nógvir bilførarar vórðu steðgaðir í norðurøkinum og í miðstaðarøkinum, men her vísti alt seg at vera í lagi, og eingi mál vórðu skrivað.
