Hóast summarið er farið at halla, og vit eru á gáttini til heystið, er alt, sum eitur festivalar og stevnur av ymiskum slag, ikki lagt aftur um enn.
Um vikuskiftið verður stóri summarfestivalurin í Klaksvík, og næsta vikuskiftið verður regattasigling í Sundalagnum og ovastevna í Nólsoy.
Forkvinnan í Hósvíkar Róðrarfelag á triðja ári, 20 ára gamla Sarita Gunnbjørnsdóttir Joensen í Hósvík, sigur, at skráin fyri regattasiglingina, sum verður av Eiði fríggjakvøldið 15. august og til Hósvíkar, nú er løgd.
- Tað verður Eyðgerð Mørkøre Kruse, sum klokkan 16.46 fer at halda røðu á Eiði, áðrenn regattaflotin loysir, og klokkan 17 verður kósin sett suður gjøgnum Sundalagið og móti Hósvík.
- Vit vænta, at bátarnir koma til Hósvíkar um 19.30-tíðina, og síðan verður matur í bygdarhúsinum frá klokkan 20.
Hon vísir á, at sum nakað nýtt í ár, verður livetónleikur í einum av neystunum við bátahylin klokkan 21.30. har Bára og Búgvi fara at syngja og spæla - og klokkan 22 fer Marni at spæla í neystinum.
- Klokkan 23 verður felagssangur, har Saggi og Hans Pauli fara at spæla undir á harmoniku, og klokkan 23.30 verður midnáttarrøða við Tórbirna Jacobsen.
Sarita Gunnbjørnsdóttir Joensen sigur, at seinast á skránni í Hósvík fríggjakvøldið verður dansur við Hans Jacobi Hjelm, og dansað verður til klokkan 04 leygarmorgunin.
- Leygarmorgunin í tímunum frá klokkan 8-12 verður morgunmatur í bygdarhúsinum, sigur unga forkvinnan í Hósvíkar Róðrarfelag, sum saman við nevnd felagsins og øðrum góðum kreftum skipar fyri regattasigling í Sundalagnum og tiltøkum í Hósvík.
