169 fólk stilla upp á løgtingsvalinum í dag. Talan er um 100 menn og 69 kvinnur. Soleiðis halda allir flokkar tilsamans seg innan fyri ásetingarnar í javnstøðulógini um, at í minsta lagi 40 prosent av hvørjum kyni skulu vera umboðað – tó at javnstøðulógin ikki er galdandi fyri uppstilling til løgtingsval.

Av teimum uppstillaðu eru 59,2 prosent menn og 40,8 prosent kvinnur.

Tað er flokkunum loyvt at stilla upp 43 valevni hvør. Í løgtingsvallógini er ásett, at flokkar kunnu stilla 10 fólk fleiri upp, enn tað kunnu veljast á ting. Tað verða vald 33 fólk á ting.

Fyri at fáa fólk vald á ting skal ein flokkurin hava 1/33 part av atkvøðunum. Harvið er tinggáttin 3,03 prosent. Fær ein flokkurin ikki tað, so fær hann einki umboð valt. Um ein flokkur til dømis fær 3 prosent av atkvøðunum, so verða tey 3 prosentini tikin frá og býtt millum hinar flokkarnar eftir stødd, áðrenn mandatbýtið verður roknað út.

Hesaferð hava 39.017 fólk valrætt. Um øll fara á val, so krevjast 1.183 atkvøða, fyri at ein flokkur skal fáa umboð á ting. Men øll fara ikki á val. Seinast fóru 91,8 prosent á val. Siga vit, at valluttøkan hesaferð verður tann sama, so skal ein flokkur hava 1.086 atkvøður fyri at fáa umboð valt á ting. Minsti flokkur seinast var Sjálvstýrisflokkurin. Hann fekk 1158 atkvøður. Soleiðis kunnu vit siga, at um tað verður atkvøðutalið aftur hesaferð, so er hann 72 atkvøður oman fyri tinggáttina og fær umboð valt á ting.

Tey sum stilla upp fyri teir sjey flokkarnar eru hesi: