Lagt til rættis: Simona Weihe
Í morgin, grækarismessudag, fyllir Tilhaldið í Havn 15 ár.
1999 var Altjóða Eldraár. Hesi avbjóðing tók Tórshavnar kommuna av við m.a. at lata teimum gomlu húsið longu árið fyri, í 1998.
Fyrstu árini fekk Tilhaldið fígging til raksturin gjøgnum Almannastovuna. Í 2009 varð hendan játtan strikað. Tórshavnar kommuna kendi sína ábyrgd og tók um endan.
Við hesum hevur Tórshavnar kommuna tryggjað eldru borgarum sínum nýggjar avbjóðingar, at menna seg og ríka gerandisdagin, sum hevur alstóran týdning fyri lívsgóðskuna.
Stásiliga húsið í Tórsgøtu hevur hesi 15 árini verið hugnaligur og kveikjandi karmur um gerandisdagin hjá túsundtals fólkum. Í fjør var talið á vitjandi 15.747.
Wanja Petersen, sjúkrarøktarfrøðingur, hevur frá byrjan verið leiðari av Tilhaldinum. Hon hevur saman við starvs- og húsfólkunum skipað so fyri, at hvørja viku eru 26 ymisk tilboð at velja í. Tilboðini verða vald við tí fyri eyga, at tey skulu vera fyribyrgjandi, heilsufremjandi og geva lívsgóðsku.
Vit hava verið í Tilhaldinum og fingið Wanju Petersen at siga eitt sindur um, hvussu húsið hevur virkað og ment seg hesi 15 árini.
Í húsinum er vevstovu, teldustovu, motiónsrúm, seymirúm, verkstað til horn- og beinarbeiði, bókasavn og annað.
Umframt virksemið innanhýsis so hava tey í Tilhaldinum verið mangar útferðir. Skipað verður fyri fyrilestrum, skeiðum og kvøldsetum. Mentanarnáttina og á ólavsøku eru framsýningar á skránni.
Sum leiðari í Tilhaldinum hevur Wanja hegnisliga og við virðing fyri søguliga og mentanarliga virðinum, slíkur bygningur umboðar, skipað fyri áhaldandi umvælingum og ístandsetan, so í dag verður alt húsið brúkt, ímóti at byrjað varð í smáum í 98 við bert at húsast á einari hædd.
Wanja Petersen greiðir frá, at hugsjónir Tilhaldsins eru:
• At varðveita og menna heilsuna, so lívsgóðska framhaldandi gongur aftur sum ein reyður tráður gjøgnum lívið.
• Ein stovnur, har hugni, trivni, menning og virðing fyri tí einstaka er í hásæti.
• Har øll kenna seg væl, fáa nýtt síni evni og førleikar, læra og hava tað stuttligt.
• Skal gera mun fyri lív og heilsu.
• Arbeiðið er grundað á meginreglurnar hjá ST.
• Arbeiðið verður gjørt við atliti til samfelagið.
----
FAKTA
Játtan 2012: 890.000 kr.
Stødd: 546 fermetrar
Normering: 1,44 ársverk + tímaløn til skeiðsundirvísarar
og fyrilestrahaldarar
Harafturat eitt ótal av gávumildum hondum, sum gera eitt megnar sjálvboðið arbeiði í og uttan fyri Tilhaldið
Tilboð: 26 ymisk um vikuna
Opið: mánadag–fríggjadag kl. 9–16
Vitjandi: Í 2012 vóru 15.747
Ongin limaskapur er. Leiðarin hevur fíggjarliga ábyrgd.
Húsfólkini velja nevnd. Nevndin er mannað við pensjónistum og hevur saman við leiðaranum ábyrgd av tiltøkunum. Fundur er eina ferð um mánaðin
° ° ° ° °
Í 2012 vóru 19.876 íbúgvar í Tórshavnar kommunu og av teimum 3.818 yvir 60 ár (kelda: Hagstovan)
----
Søgan um húsið
Varð bygt beint eftir at Føroya Banki varð settur á stovn í 1906. Og her helt bankin til, til hann flutti í nýggja bankabygningin í 1958. Tá flutti so Tekniski Skúlin inn og var har til hann flutti í egin høli við Velbastaðvegin. Seinni ognaði kommunan sær húsið.
