Ein ikki sørt vakur tanki – sum kortini er rættiliga naivur.
Meinar Høgni Hoydal veruliga, at tað ber til at semjast um tað í Føroyum? Heldur hann veruliga, at tað fer at spyrjast nakað gott burturúr, at lærarar á skúlum kring landið fara at trútta niður í børnini um fólkaræði á einum degi, sum hevur elvt til so nógv klandur og stríð og spjaðing, sum 14. september?
Tá mugu vit siga sum Edmund og Bárður og aðrir svartir sambandsmenn, at hatta er at vilja konfrontatiónina.
At læra um fólkaræði er bara gott. Men at knýta fólkaræði saman við stríðs- og frælsisdegnum hjá 18,3 prosentum av føroysku veljarafjøldini, tað er í besta føri ein naivur tanki – nakað sum tá Tórbjørn Jacobsen á sinni avtók grundlógardagin sum frídag hjá skúlunum, sum í staðin fingu frí á altjóða arbeiðaradegnum 1. mai. Tann royndin miseydnaðist eisini, tí Anfinn Kallsberg tók bersøgna landsstýrismannin av ræði.
