Árni Joensen
Tað stendur ikki á hjá løgregluni at finna fólk, sum eru til reiðar at játta seg sek. Blaðið Dagens Nyheter skrivar, at síðani løgreglan fór undir at kanna morðið, hava ikki færri enn 130 fólk viðgingið, at tey myrdu Palme.
Svenska løgreglan ásannar, at ofta er lítið høpi í teimum upplýsingum, sum fólk koma við, men enn vónar hon, at onkur fer at koma við tí, sum kann loysa gátuna. Stig Edqvist hjá løgregluni, sum hevur arbeitt við Palme-morðinum í 14 ár, ásannar í samrøðu við Dagens Nyheter, at tað er ikki altíð líka hugligt at arbeiða við einum tílíkum máli.
Løgreglan hevur skrivað frágreiðingar um øll tey 130, sum hava sagt, at tey myrdu Palme. Men løgreglan trýr ongum teirra. Tann einasti, sum kundi sannføra løgregluna um, at hann var drápsmaðurin, var Christer Pettersson. Hann bleiv eisini dømdur, men varð seinni fríkendur. Í 2004 segði Christer Pettersson, at hann hevði okkurt, sum hann ætlaði sær at siga eftirkomarunum hjá Palme, men hann doyði av heilsbløðing, áðrenn hann fekk sagt tað.
