12 søgur um at finna, merkja, fáa, geva, líta á, missa, varðveita, tora, trúgva upp á og ynskja kærleika.
17. februar hevur Soli Deo Gloria eftir Peter Asmussen frumsýning á Tjóðpallinum. Soli Deo Gloria er ein kaleidoskopiskur leikur um okkum menniskju í støðum har tørvurin á kærleika er størstur og evnini at elska eru minst. Ein leikur um at vera á lívi og at vera í lívinum.
Peter Asmussen (1957-2016) var danskur rithøvundur, dramatikari og leikritahøvundur. Hann vann tvær ferðir Reumert virðislønina sum ársins dramatikari, fyrru ferð í 2010 fyri INGEN MØDER NOGEN og seinnu ferðina í 2016 fyri Soli Deo Gloria. Peter Asmussen skrivaði harumframt m.a. filmshandritið til Breaking the Waves saman við Lars von Trier í 1996.
Peter Asmussen skrivar beinrakið og uttan stórvegis undirtekst og hann letur leiklutirnar siga tingini bart út. Í grundgevingini fyri at lata Peter Asmussen Reumert prísin fyri Soli Deo Gloria segði dómsnevndin m.a:
- Í Soli Deo Gloria vísir Peter Asmussen ein einastandandi málsligan og dramaturgiskan neyvleika, sum setir hann í heimsflokk saman við Strindberg, Bergman og Norén. Við eini beinhart skamtaðari frásøgn lýsir Asmussen stuttar leikmyndir, sum í spenninum millum søgulig tíðarskeið og geografisk støð upploysir frásøgurúmið til eitt ongamannaland - eitt dreymaspæl.
LEIKSTJÓRI: Christoffer Berdal (DK)
PALLMYND & LJÓSDESIGN: Turpin N. Djurhuus
LEIKRIT: Peter Asmussen
TÓNLEIKUR: Sakaris
LEIKARAR: Hans Tórgarð, Beinta Clothier, Gunnvá Zachariasen og Allan Dalsgarð
TÝÐING: Hans Tórgarð
Leikstjórin Christoffer Berdal er føddur í 1967 og útbúgvin pallleikstjóri á Statens Teaterskole í1998. Hann hevur leikstjórnað fleiri enn 70 leikum á smáum og stórum pallum í og uttan fyri Danmark. Frá klassikarum til nýskrivaðan dramatikk og opera. Millum annað: Absolut Holberg, Erasmus Montanus og Den Stundesløse á Grønnegårdsteatret. Bygmester Solnes, Jeppe på Bjerget og Terror á Det Kongelige Teater. Mågen, Gergersen sagaen, Mesteren og Marguerite á Århus Teater. Pigen fra Vesten á Den kongelige opera. Stovugenturnar, leikbólkurin Tvazz (FO). Harumframt hevur hann undirvíst leikstjórum og sjónleikarum og arbeitt við sjónleiki viðpalestinskum og irakiskum flóttum í Danmark og Miðeystri.
Peter Asmussen er áður framførdur í Føroyum.
Í 2016 vitjaðu íslendsku Maria Ellingsen og Bjørn Ingi Hilmarsson við EINGIN MØTIR NØKRUM, og SOLI DEO GLORIA var sama árið framførdur sum Reading (upplestur) á norðurlendska festivalinum DAGARNIR 2016. Leikurin ONGIN MØTIR NØKRUM var eisini framførdur á LeikREAD á Tjóðpallinum í 2013 við Anniku Johannessen og Páll Danielsen
Soli Deo Gloria - seinasta meistaraverkið hjá Peter Asmussen - hevur frumsýning á Tjóðpallinum leygardagin 17. februar
Myndir: ©Tjóðpallur Føroya | Heinesen myndir
