Seinnapartin í gjár var lítil samkoma í hølunum hjá Psykiatrifelagnum í »Jákupsstovu«, har limir úr felagnum og onnur áhugað vóru samankomin at heiðra fráfarandi formannin og tann nýggja.
Kerstin Rasmussen helt sjálv fyri, at hon hevði nógv at takka Sjúrða fyri.
- Hann hevur verið sera arbeiðssamur, humoristiskur, diplomatiskur og altíð góður í ráðum. Og so er hann ein ørn, tá talan er um samráðingar, legði hon aftrat.
Í nevndini í Psykiatrifelagnum eru umframt Kerstin Rasmussen eisini Marner Tausen, Don Petersen, Sveinbjørn Olsen og Kári Niclasen.
Tiltakslimir eru Guðrið í Bartalsstovu og Sølva Heinesen.
Í tryggum hondum
Nú Kerstin Rasmussen hevur lagt til brots við nývaldu nevndini, hevur hon sjálv nøkur hjartamál, sum hon ynskir at fremja í framtíðini.
Fyrst og fremst ætlar hon at leggja stóra orku í at samstarva við limirnar í hennara egna felagi, men eisini við millum annað onnur fakfeløg og arbeiðsgevaran.
- Tað er altíð gott at kenna avmarkingar, men ikki minst førleikarnar hjá einum sjálvum, men eisini hjá øðrum. Á henda hátt kunnu vit gagnnýta vitanina hjá hvørjum øðrum, legði hon dent á.
Eitt serligt samstarv hevur verið við Almanna- og Heilsurøktarfelagið, har feløgini samráddust saman og fingu ein sáttmála í hús, sum báðir partar vóru nøgdir við.
Eitt tað fyrsta, ið farið verður í holt við er verkætlanin sum umfatar eina uppskúling av pleygarum til heilsurøktarar. Pleygarar eru ein fakbólkur við fleiri limum, men hvørs útbúgving ikki er til longur.
Sjúrður Norðbúð segði í síni takkarrøðu, at hetta høvdu verið 12 góð ár í nevndini.
- Eg haldi, at Psykiatrifelagið hevur fingið ein góðan formann. Felagið hevur nógvar stórur uppgávur at loysa í framtíðini. Men í hondunum á Kerstin, er felagið í tryggum hondum, legði Sjúrður Norðbúð dent á.
