Fólkatalið veksur í Havn, og sambært Hagstovuni hendir nógv áhugavert við fólkatalinum í Tórshavnar kommunu.
Tórshavnar kommuna vísir á, at fyri fyrstu ferð klárar kommunan í 2014 at halda seg oman fyri 20.000 íbúgvar pr. 31. august, tá tann størsta fráflytingin annars er. Fólkatalið pr. 31. august 2014 er 20.146.
Í august í fjør fluttu 346 úr Tórshavnar kommunu av landinum, í august í ár bert 201. Eisini eru flutt fleiri til kommununa úr útlandinum í august – í 2013 fluttu 104 til kommununa, í ár 131.
Alt 12 mánaða tíðarskeiðið september 2013 til august 2014 hevur Tórshavnar kommuna eina tilflyting uppá 201, harav 64 eru frá øðrum pørtum av landinum og 137 frá útlandinum.
Eisini í burðartølunum er framgongd. Framroknað fyri árið 2014 verður talið av nýføðingum 282 – í fjør var tað 256. Framroknað fyri árið 2014 verður burðaravlopið 135, sum eisini er nakað hægri enn í fjør.
Við vaksandi tilflytingini og burðaravlopinum, so er fólkatalið tíðarskeiðið 31. august 2013 til 31. august 2014 vaksið 0,98%, ella við 331 fólkum. Hetta klárar sostatt at vinna inn aftur vøksturin í aldursbólkunum eldri enn 60 ár, sum liggur í miðal um 100 um árið.
Í miðal eru trý fólk í hvørjum húski. Tá vøksturin er 331, so merkir tað, at í alt 110 nýggj húski hava sett búgv í Tórshavnar kommunu síðsta árið.
