10-mannafarið á Argjum vunnið FM fyri fyrstu ferð

Um tað var onkur, sum hevði roknað við, at tað skuldi verða spennandi, og at Vestmenningur fór at bjóða argjamonnum av, so var róðurin í dag eitt vónbrot.

Drekin Reyði sprakk beinanvegin avstað, og so var spurningurin bara, hvussu sannførandi sigurin fór at verða hjá 10-mannafarinum hjá Argja Róðrarfelag. Tá ið reyði báturin fór um málið, hevði Vestmenningur tvær bátslongdir á mál, og so var meiri enn leyst aftur til Havnarbátin, Eysturoying og Ormin Langa, sum var aftastur.

Hetta er fyrsta árið, at Argja Róðrarfelag bjóðar seg fram við egnum 10-mannafari, og longu undan ólavsøku er tað greitt, at Drekin Reyði í fyrstu royndini hevur vunnið FM.